VALMYND ×

Fréttir

Rafhlaupahjól og vespur

Frá Samgöngustofu

Ágætu foreldrar

Hér er tilkynning frá Samgöngustofu og hlekkir þar sem hægt er að fræðast nánar um notkun og öryggi í tengslum við rafhlaupahjól og vespur

Vinsældir rafhlaupahjóla og léttra bifhjóla í flokki I (vespa) hafa aukist að undanförnu hér á landi enda frábær farartæki séu þau notuð rétt. Við hjá Samgöngustofu höfum nú tekið saman upplýsingar um notkun þeirra og öryggi

Rafhlaupahjól:
Upplýsingasíða um rafhlaupahjól: www.samgongustofa.is/rafhlaupahjol


Fræðslumyndband um rafhlaupahjól á íslensku, með enskum texta og með pólskum texta.

https://www.youtube.com/watch?v=2dAK5MKM3As&list=PL3prAqz9YEX4yyfaxFCn0vy65LFI05wEU&index=2

 

Upplýsingasíða um létt bifhjól í flokki I: www.samgongustofa.is/lettbifhjol


Fræðslumyndband um létt bifhjól í flokki I á íslensku, með enskum texta og með pólskum texta.    

https://www.youtube.com/watch?v=45V0Vj_zWTU

 

Fréttir vikunnar 25.-28.maí

Hoppað í sjóinn
Hoppað í sjóinn
1 af 3

Veðrið hefur leikið við okkur þessa viku og því hefur verið mikið um útivist hjá nemendum og svo hefur tíminn verið nýttur í kannanir og allskonar frágang á verkefnum.

Nemendur 2.bekkjar luku við að smíða blómakassana sem þeir voru að gera í smiðjunni útivist og upplifun og settu niður sumarblóm. Ég fullyrði að þetta eru krúttlegustu blómakassar á Vestfjörðum og þó víðar væri leitað. 

1.bekkur fékk að vanda gefins hjólahjálma frá Kiwanis. Rétt er að minna á að allir yngri en 15 ára eiga að vera með hjálm á hjóli. 

Við fengum niðurstöður úr Lesfimiprófum Menntamálastofnunar og þar má sjá að nemendur skólans eru í góðri framför, enda hafa þeir lagt mikið á sig.

Ærslabelgurinn sem Kvenfélagið Ársól gaf samfélaginu hefur heldur betur gert lukku og gleðin þar verið mjög mikil eins og sjá má á þessu myndbandi hér https://www.youtube.com/watch?v=mqt_GyUSlbc

Þá var hefðbundið ,,hopp í sjóinn“ á dagskrá hjá unglingunum í dag og þar var líka mikil gleði.

Dagskrá næstu viku mun litast af útivist og gleði alla daga.

Á mánudag fara bæði mið- og yngsta stig í heimsóknir. Yngsta stig fer á Ísafjörð og í Önundarfjörðinn og miðstigið heimsækir vini okkar á Þingeyri. Unglingastigið verður hér heima en fær að prófa að fara á kajak og fleira skemmtilegt. Þetta er jafnframt síðasti dagur í mötuneyti hjá okkur.

Á þriðjudag fara bæði miðstig og unglingastig í hjólaferðir. Unglingastigið hjólar með Söru á Ísafjörð og Bryndís fer með sem bílstjóri og sérlegur aðstoðarmaður. Miðstigið fær hjólin sín flutt inn að Botni og hjólar þaðan með Eddu og Jónu út í Selárdal. Jói aðstoðar við að koma krökkunum inn eftir. Yngsta stigið verður í útivist með Ásu og Lindu.

Á miðvikudag verða allir hópar í tiltekt, frágangi og leikjum. Þann dag verður hópleikur klukkan 11:00 sem allir bæjarbúar eru velkomnir með í. Klukkan 12 verður svo sameiginlegur matur fyrir alla nemendur og kennara.

Skólaslit verða svo föstudaginn 4.júní. Yngsta- og miðstig mæta klukkan 10:00 og fá sinn vitnisburð en unglingastigið mætir klukkan 17:00 í útskriftarathöfn fyrir 10 bekk og afhendingu vitnisburðar fyrir aðra.

Gaman væri ef sem flestir foreldrar gætu komið með nemendum á skólaslitin.

Kveðja

Starfsfólkið í skólanum

Aukafrétt um lestur

Ágætu lesendur

Í dag vorum við að fá niðurstöður úr Lesfimiprófum Menntamálastofnunar fyrir þetta skólaár en stofnunin hefur skilgreint þrjú viðmið í lestri fyrir hvern árgang og undanfarin ár höfum við verið undir þeim viðmiðum í nokkrum árgöngum. Niðurstöðurnar núna eru samhljóma niðurstöðum í janúar sem við þorðum varla að trúa og sýna augljósar framfarir nemenda í lestri.  Við lok skólaársins 2020 voru þrír árgangar sem náðu ekki lágmarksviðmiði en nú er aðeins einn árgangur í þeirri stöðu. Við erum himinlifandi með þetta og þökkum öllum sem hafa lagt sig fram, nemendum, foreldrum og starfsmönnum þennan góða árangur.

Fréttir vikunnar 17.-21. maí

Brúarsmiðir Reykjavíkurborgar í heimsókn
Brúarsmiðir Reykjavíkurborgar í heimsókn
1 af 4

Það er búið að vera mjög mikið um að vera hjá okkur þessa vikuna. Á mánudag fengum við heimsókn frá Umboðsmanni barna sem ásamt þremur starfsmönnum embættisins hitti alla nemendur og átti sérstakan tíma með 6.bekk. Þessir gestir höfðu orð á því hvað nemendur í þessum skóla þekktu réttindi barna vel og væru færir í samræðum.

Á þriðjudag vorum við með fjölmenningarfræðsluna fyrir nemendur, starfsfólk og foreldra. Þá komu ,,Brúarsmiðir“ frá Reykjavíkurborg til okkar og voru með umfjöllun um mikilvægi þess að leggja sig fram um að skilja ólíka menningu og hvað hægt er að gera til að efla þátttöku í samfélagi.  Þær voru svo einnig með fræðslu um íslenska skólakerfið fyrir foreldra sem ekki hafa reynslu af því sjálfir.  Þessir fræðslufundir voru mjög gagnlegir. Við þökkum öllum þeim sem mættu kærlega fyrir þátttökuna og skemmtilegar umræður. Auðvitað eru aðstæður fólks misjafnar til að sækja svona fundi og við gerum ráð fyrir að þeir sem ekki mættu hafi haft gildar ástæður fyrir því, en við hefðum gjarnan viljað sjá meiri þátttöku frá foreldrum með íslenskan bakgrunn því það er sameiginlegt verkefni okkar að byggja upp samfélag þar sem ætlast er til af öllum að þeir bæði gefi og þiggi.

Við vorum beinlínis hrærð yfir viðbrögðum brúarsmiðanna eftir heimsóknina og því ætla ég að setja hér með hluta úr tölvupóstinum sem þær sendu að heimsókn lokinni

,, Ég vil byrja að þakka fyrir okkur J Við vorum heillaðar af ykkar flotta og metnaðarfulla skólastarfi J Mér finnst alveg magnað að sjá hvað þið eruð að gera og metnaðurinn er einstakur“

Það er ekki oft sem við fáum sérfræðinga að sunnan í skólann og því er okkur mikils virði að fá jákvæð viðbrögð og þetta sýnir okkur að litlir skólar á enda veraldar geta alveg verið framúrskarandi í sínum verkefnum.

Á miðvikudag tóku síðan stelpurnar í 9.bekk þátt í viðburðinum ,,Stelpur og tækni“ sem sendur var út frá Háskólanum í Reykjavík. Þetta er í annað sinn sem við tökum þátt í þessu og eitt af því sem farið var að bjóða rafrænt með tilkomu Covid-19 svo það hefur líka haft jákvæð áhrif í einhverju.  Stelpurnar okkar voru mjög ánægðar með verkefnin sem þær unnu í gegnum þetta.

Á fimmtudag fundaði svo skólaráðið og þar var farið yfir helstu upplýsingar vegna komandi skólaárs. Nemendur komu með tillögu um að kaupa fleiri áhugaverðar bækur og að stytta matartímann aftur í 30 mínútur og þær tillögur verða settar í framkvæmd fyrir næsta ár.

Fyrir utan allt þetta voru svo nemendur yngsta stigs að smíða blómaker og nemendur miðstigs héldu uppskeruhátíð eftir lestrarátakið sitt. Þar fengu nemendur eina poppbaun fyrir hverja mínútu sem þeir lásu á tilteknum tíma og söfnuðu þannig saman með lestrinum yfir þremur kílóum af poppbaunum.

Fréttir vikunnar 10.-14.maí 2021

Í þessari viku ber hæst nemendaþingið sem haldið var á þriðjudaginn. Þá ræddum við um hvernig tækni gæti verið gagnleg eða skaðleg bæði í námi og félagslífi. Allir nemendur tóku þátt og komu með margar góðar tillögur sem svo var forgangsraðað og hér birtast fjögur efstu atriðin í hverjum flokki. 

Í flokkinn gagnlegt í námi fór:

  • o Google docs, classroom, mentor og slides
  • o Að leita að upplýsingum og hugmyndum
  • o Að hlusta á tónlist
  • o Að hjálpa við að læra

Í flokkinn truflandi í námi fór:

  • o Ef nemendur fara í tölvuleiki þegar á að vera að læra
  • o Krakkar geta illa einbeitt sér og fara á youtube
  • o Krakkar geta notað hana til að svindla
  • o Ef nemendur vinna ekki í verkefnum
  • o Ef það er hátt hljóð í tölvunum

Í flokkinn gagnlegt í félagslegum samskiptum fór:

  • o Hægt að vera í samskiptum við fjölskyldu eða vini sem búa langt í burtu til dæmis með messenger eða skype
  • o Hægt að hringja og tala við vini og senda myndir
  • o Hægt að kynnast nýjum krökkum á internetinu
  • o Að senda skilaboð

Og í flokkinn truflandi í félagslegum samskiptum fór:

  • o Fólk hættir að hitta aðra og situr bara í tölvunni
  • o Þegar einhver er lagður í einelti á netinu
  • o Þegar verið er að senda myndir án samþykkis
  • o Fólk talar ekki saman, sendir bara skilaboð eða er í símanum

Svo var spurt ,,hvernig getur tækni verið skaðleg?“ og þar voru þessi fjögur atriði efst á blaði

  • o Ef þú trúir öllu sem þú sérð á netinu
  • o Líka þegar nemendur skoða ljóta hluti á Youtube
  • o Þegar krakkar skoða efni sem er ekki fyrir þeirra aldurshóp
  • o Þegar maður er í símanum allar nætur og er þreyttur eða sefur í skólanum

Og ,,Hvað veldur því að maður ánetjast tækni?“

  • o Tæknin verður sífellt betri og það viðheldur áhuganum og þá heldur maður áfram
  • o Dopamine
  • o Þegar þú gerir ekki neitt annað
  • o Tölvuleikir, Tiktok og svoleiðis

Eins og lesendur sjá, vita nemendur algjörlega hvað er gagnlegt og hvað ekki þegar kemur að tækninotkun. Hugmynd okkar er að nota þessa vinnu nemenda sem grunn að stefnu skólans hvað varðar snjalltækjanotkun.

Frekari umfjöllun um nemendaþing skólans má lesa hér http://www.bb.is/2021/05/ad-laera-um-lydraedi-i-lydraedi/

Orð síðustu viku var ,,agndofa“ og komu 22 tillögur frá nemendum en engin þeirra var rétt en orðið þýðir forviða eða stein hissa. Orð næstu viku er komið upp á vegg og tengill á það fylgir einnig hér með. https://padlet.com/grsud1/7zfn9sdj6gv7f475

Og síðast en ekki síst minnum við á foreldrafræðsluna sem verður þriðjudaginn 18.maí kl.17-19 hér í grunnskólanum. Fræðslan er hluti af þróunarverkefninu okkar sem hefur það að markmiði að efla þekkingu samfélagsins alls á því hvað það þýðir að ala upp barn í fjölmenningarsamfélagi. Vonandi geta allir foreldrar mætt.

Kveðja

Starfsfólkið í skólanum

Fréttir vikunnar 26.-30.apríl 2021

Nýi prentarinn byrjaður að vinna
Nýi prentarinn byrjaður að vinna
1 af 5

Það er alltaf nóg um að vera hjá okkur í skólanum og fyrri hluta þessarar viku lék veðrið við okkur og talsvert var um útivinnu hjá nemendum. Yngsta stig var að vinna bæði með áttirnar í umhverfinu og með samanburð á þrívídd og tvívídd og í þeim tilgangi skoðuðu nemendur húsin sem þeir búa í og reyndu að átta sig á hvernig loftmynd af þeim myndi líta út.

Nú þá er rétt að segja frá því að búið er að koma þrívíddarprentaranum okkar í gang eftir talsvert bras þar sem við fengum fjögur gölluð eintök í röð og því hefur þetta verkefni tafist en vonandi náum við að komast af stað með það fyrir vorið.

Við lukum svo vikunni með leikjadegi þar sem nemendur hafa verið svo duglegir að lesa að þeir áttu það svo sannarlega skilið. Veðrið var kannski ekki alveg eins gott og við hefðum viljað en krakkarnir eru hraustir og þó að mörgum væri kalt náði gleðin að vega upp á móti því. Unglingastigið skipulagði hópleiki sem fóru fram á fimm stöðvum, þar var meðal annars farið í leikina flækja og gulrót og ekki má gleyma skotboltanum sem er uppáhaldsleikur nemenda hér í skólanum. Eftir hádegi spiluðum við svo gogg sem er skyldur fótbolta en leikmenn hafa mjög takmarkað útsýni eins og sjá má hér í myndasafni frá deginum.

Við viljum svo minna ykkur á að enn gildir vetrartími hvað varðar útivist barna og mikilvægt er að foreldrar séu samstíga um að virða hann.

Bestu kveðjur og hafið það gott um helgina

Starfsfólkið í skólanum

 

Fréttir vikunnar 19.-23 apríl 2021

Algeng öpp sem nemendur nota
Algeng öpp sem nemendur nota

Þessi vika stutt hjá nemendum, aðeins þrír dagar en það var nú samt góður gangur í málum.

Nemendur 5.bekkjar byrjuðu vikuna á fræðslufyrirlestri frá VÁ Vest um notkun samfélagsmiðla. Það er aldrei of oft talað um notkun þeirra við nemendur og mikilvægt að foreldrar ræði einnig um hvaða hegðun er viðeigandi þar eins og annars staðar. Þá bauðst foreldrum einnig fræðslufundur um sama mál að kvöldi mánudags. Við sem sinnum uppeldi verðum að vera meðvituð um hvað börnin okkar gera á internetinu, við mælum með því að foreldrar skoði reglulega síma nemenda og séu virkir á samfélagsmiðlum ef börnin þeirra eru það. Það verða allir foreldrar að vita hvaða öpp börnin þeirra eru að nota og þekkja helstu virkni þeirra.  Í þessum heimi eru ótal hættur sem börn geta komið sér í með sakleysislegum viðbrögðum og eins senda þau hvert öðru oft skilaboð með orðum sem þau myndu aldrei nota við aðra og lenda svo í vandræðum vegna þeirra. Góð regla er að gera ekkert á samfélagsmiðlum sem þú vilt ekki að ,,amma þín og afi“ frétti af því ömmur og afar nútímans eru einmitt oft mjög virk í þessari notkun.

Sundkennslan hófst á mánudag og sundkennarinn, hún Guðríður Sigurðardóttir er mjög ánægð með framkomu nemenda og færni þeirra í sundi.

Í dag, fimmtudag, var svo starfsdagur í skólanum sem við notuðum til að vinna með innra mat í skólastarfi sem er eitt af verkunum sem allir skólar eiga að vinna og á því grundvallast svo starfsmarkmið næsta skólaárs.  Við þáðum einnig veitingar frá Kvenfélaginu Ársól sem við þökkum fyrir.

Við höfum tekið upp aftur liðinn ,,Orð vikunnar" í síðustu viku var að orðið ,,árrisull" sem nemendur komu með tillögur að hvað þýddu. Einn var með það rétt en önnur góð tillaga var ,, að vakna blautur". Það gefur auga leið að orðið árrisull hlýtur að hafa eitthvað með vatnssull að gera.

Við höfum enn einu sinni fært foreldrafræðsluna til og nú til 18.maí. Vonandi getum við verið með þetta þá en ef ekki færist hún fram á næsta haust.

Á morgun er svo vetrarfrísdagur hjá nemendum og svo skóli næst á mánudag.

Hafið það gott um helgina

Starfsfólkið í skólanum

Fréttir vikunnar 12.-16.apríl

Þessa vikuna hefur flest verið með hefðbundu sniði hjá okkur. Nemendur komu glaðir og vinnusamir úr páskafríi og njóta vorblíðunnar í frímínútum. Það voru skipti í smiðjum hjá okkur í þessari viku og piltarnir okkar í 7.bekk voru svo ánægðir með baksturinn í gæt að ég mátti til með að setja mynd af þeim með þessari frétt.

Við verðum því miður að færa foreldrafræðsluna einu sinni enn vegna Covid-19 og sóttvarnaráðstafana og næsta fyrirhugaða dagsetning er 18.maí.

VáVest býður foreldrum 5.-10.bekkjar  upp á forvarnafyrirlestra í þessari viku og næstu, hlekkir vegna þeirra hafa verið sendir í mentor pósti.

Ég minni á að sundkennsla hefst á mánudag og verður á mánudögum, miðvikudögum og föstudögum í fjórar vikur.  Það eru dagar sem við erum með íþróttahúsið en við viljum ekki að allir íþróttatímar falli niður vegna þessa og því þurfa nemendur alltaf að koma með bæði íþrótta og sundföt þessa daga.

Að lokum minni ég á að það er bara þriggja daga skólavika hjá nemendum í næstu viku þar sem á fimmtudag er sumardagurinn fyrsti og starfsdagur á föstudag.

Kveðja úr skólanum

Fréttir vikunnar 6.-9.apríl 2021

Gæsir reyna að komast í leik
Gæsir reyna að komast í leik
1 af 2

Þessi vika hefur verið nýtt til að klára verkefnin sem hafin voru á þemadögunum og eru þau nú flest fullkláruð og munu verða til sýnis um leið og færi gefst á því. Við veitum ykkur smá forskot með því að setja með þessari frétt mynd af líkani af kirkjunni okkar sem nemendur unglingastigs hafa verið að gera.

Við höfum líka verið upptekin af eldgosinu á Reykjanesi og höfum nýtt okkur það í stærðfræðinni. Einn rúmmetri var búinn til úr pappa og svo reiknuðum við út hve langan tíma tæki að fylla kennslustofu, allan skólann og íþróttasalinn miðað við hraunrennslið eins og það var 5.apríl.  Nemendur giskuðu fyrst á hversu langan tíma þetta tæki og urðu furðu lostnir þegar þeir áttuðu sig á að það tæki aðeins um 20 sekúndur að fylla kennslustofu, rúmar 3 mínútur að fylla allan skólann og aðeins 6 mínútur að fylla íþróttasalinn.

Gæsinar á tjörninni hafa verið æstar í að vera með krökkunum þessa viku við mikla ánægju margra, þær eyða líka löngum stundum fyrir framan íþróttahúsið við að spegla sig í gluggunum og krakkarnir hafa mjög gaman af að fylgjast með þeim við þessa iðju.

Foreldrafræðslunni sem átti að vera þann 13.apríl hefur enn og aftur verið frestað og núna aðeins um viku eða til 20.apríl. Von okkar er að 15.apríl verði slakað á sóttvörnum þannig að mögulegt verði að halda fundinn.

Sundkennsla hefst þann 19.apríl, kennt verður á mánudögum, miðvikudögum og föstudögum til og með 14.maí.

Kveðja

Starfsfólkið í skólanum

Spilapakkar og kennslumyndbönd

Heimsókn á leikskólann
Heimsókn á leikskólann
1 af 2

Við í skólanum vorum með þemadaga í síðustu viku og ætluðum að ljúka þeim með sýningu á verkefnum nemenda.  Þá stóð einnig til að bjóða nemendum á töfrasýningu með Einari Mikael þar sem þeir áttu að fá kennslu í að gera spilagaldra og fleira.  Vegna sóttvarnaráðstafana gátum við ekki lokið þessu eins og við vildum en okkur langaði samt að koma spilum sem áttu að fylgja sýningunni til nemenda.  Við ákváðum að gera tilraun með að fara út með jólasleðann og keyra spilapökkunum heim til sem flestra nemenda, en það reyndist svo ógerlegt vegna margskonar hindrana svo farið var með sleðann í heimsókn á leikskólann og svo tók hann nokkra hringi á fótboltavellinum.  Því miður misstu sumir af þessum óvænta viðburði en þeir sem voru með voru mjög glaðir.  Allir foreldrar og þeir nemendur sem eru með skráð netföng í mentor hjá okkur hafa fengið sendan hlekk með kennslumyndbandi um spilagaldra, spilastokkar bíða nemenda hér í skólanum og þeirra má vitja þegar augljóst er að einhver er við.

Gleðilega páska